රත්තණපිටිය පරමධර්මවර්ධනාරාමය, බොරලැස්ගමුව
ගැලරිය - උත්සව සහ වැඩසටහන්
01. නව දේවාලය සදහා මුල් ගල තැබීම
පරමධර්මවර්ධනාරාමස්ථ ඉපැරණි දේවාල මන්දිරය ප්‍රතිසංස්කරණය කිරීමේ පුණ්‍ය කටයුත්ත විහාරාධිපති රත්තොට සීලවංස හිමියන්ගේ අනුශාසනා පරිදි, බෙල්ලන්විල රාජමහා විහාරාධිකාරී, ශ්‍රී ජයවර්ධනපුර විශ්වවිද්‍යාලයේ උපකුලපති, කෝට්ටේ ශ්‍රී කළ්‍යාණි සාමග්‍රි ධර්ම මහා සංඝ සභාවේ අනුනායක ධූරන්ධර, අපවත් වී වදළ මහාචාර්ය අතිපූජනීය බෙල්ලන්විල විමලරතනාභිධාන නායක ස්වාමින්ද්‍රයන් වහන්සේගේ ප්‍රධානත්වයෙන්, 2012ක් වූ සැප්තැම්බර් මස 27 දින, පෙ.ව. 9.11ට යෙදුනු සුභ මොහොතින් ප්‍රදේශවාසී ගිහි පැවිදි සම්භාවනීය පිරිසකගේ සහභාගිත්වයෙන් උත්සවාකාරයෙන් සිදු විය.
02. සුව සවිය
රත්තණපිටිය පරමධර්මවර්ධනාරාම විහාරස්ථානය කේන්ද්‍ර කර ගනිමින් නිර්මාණය වූ "පරමධම්ම පදනම" ඔස්සේ සමාජ සුභ සාධන සත්කාරයන් රැසක් සිදු කරනු ලබයි. මෙම පදනමෙන් සිදු කෙරෙන සමාජ සත්කාරක සේවාව ප්‍රධාන වශයෙන් කොටස් 5කින් සමන්විත වේ. ඉන් "සුව සවිය" සේවාවට හිමි වනුයේ සුවිශේෂී ස්ථානයකි. සකල සත්වයාගේ උතුම්ම ලාභය නීරෝගීකම ලෙස වදාල උතුම් බුදු වදන පසක් කරගත් අප පදනම ජනතාවගේ යහපත් සෞඛ්‍යය පුරුදු ඔප්නංවමින්, වැඩි දියුණු කරමින් මිථ්‍යා සෞඛ්‍යය මත වලින් මිදුනු, යහපත් සෞඛ්‍යමත් නීරෝගී සමාජයක් බිහි කරලීම "සුව සවිය" තුළින් අපේක්ෂා කෙරේ. ආබාධිත හෝ උපකාර අවශ්‍ය ආර්ථික අපහසුතා ඇති ජන කොටස් වෙත විශේෂ අවධානය යොමු කරන අප පදනම ඔවුන් වෙත වෛද්‍යාධාර, මුදලින්, ද්‍රව්‍යමය වශයෙන් හෝ උපකරණ ආදීයෙන් උපකාර කිරීම "සුව සවිය" තුළින් අපේක්ෂා කෙරේ.
01. මාතලේ දිස්ත්‍රික්කයේ රත්තොට අලකොලමඩ ප්‍රදේශයේ සිදු කරනු ලැබූ ඇස් කණ්ණාඩි බෙදා දීමේ ප්‍රජා සත්කාරක වැඩසටහන
02. මහරගම පිළිකා රෝහල වෙත කුලගන සමිතියේ මූලිකත්වයෙන් සිදු කරනු ලැබූ වියළි ද්‍රව්‍ය බෙදා දීමේ වැඩසටහන
03. ගම්මඩු ශාන්තිකර්මය
පරමධර්මවර්ධනාරාම විහාරස්ථානය විසින් 2015 වසරේ සිට වාර්ෂිකව සංවිධානය කරනු ලබන ගම්මඩු ශාන්තිකර්මය, සෑම වසරකම මාර්තු මස තෙවන සතියේදී පැවැත්වේ. ගමටත්, ගම් වැසියන්ටත් සෙත් පැතීම මෙහි අරමුණයි. මෙම ශාන්තිකර්මය සිදු කිරීමට තුන් මසකට පෙර කප් සිටුවීම සිදු කරනු ලබයි. පරමධර්මවර්ධනාරාම විහාරස්ථානය විසින් වාර්ෂිකව සංවිධානය කරනු ලබන අති දැවැන්තම අංගය මෙය වන අතර මීට සමගාමීව මහා පෙරහැරක් සහ දිය කැපීමේ පෙරහැරක්ද පවත්වනු ලබයි.
2015
2016
04. වාර්ෂික පෙරහැර මාලාව
පරමධර්මවර්ධනාරාම විහාරස්ථානය විසින් 2015 වසරේ සිට වාර්ෂිකව සංවිධානය කරනු ලබන මහා පෙරහැර, සෑම වසරකම මාර්තු මස තෙවන සතියේදී පැවැත්වේ. ගමටත්, ගම් වැසියන්ටත් සෙත් පැතීම මෙහි අරමුණයි. මෙම පෙරහැර රත්තණපිටිය වටා වීදි සංචාරය කරනු ලබන අතර පසු දින පවත්වනු ලබන දිය කැපීමේ පෙරහැරෙන් අවසන් වේ. ඉන්පසුව මහා ගම්මඩු ශාන්තිකර්මයක් සිදු කෙරේ.

ගම්වැසියන් විසින් සංවිධානය කරනු ලබන පරමධර්මවර්ධනාරාම විහාරස්ථානයේ කඨින පෙරහැර, සෑම වසරකම ඔක්තෝබර් මස පවත්වනු ලබයි.
05. ශ්‍රද්ධාංජලී ගී සමාධිය
"ශ්‍රද්ධාංජලී ගී සමාධිය" යනු පරමධර්මවර්ධනාරාම විහාරස්ථ, "සිරි පඤ්ඤානන්ද" දහම් පාසලේ සිසු දූ දරුවන් ඇතුළු ආචාර්ය මණ්ඩලයේ මූලිකත්වයෙන් සහ සහභාගීත්වයෙන් සංවිධානය කරනු ලබන සැදැහැ ගී ප්‍රසංගයකි. මෙම සැදැහැ ගී ප්‍රසංගය, ජූනි මසට යෙදෙන සෑම පොසොන් පුර පසළොස්වක පොහෝ දිනකම පවත්වනු ලබයි.
2015
2017
2018
06. ලේ දන්දීමේ පිංකම
මෙම පිංකම, පරමධර්මවර්ධනාරාම විහාරස්ථානයේ ආදි කතෘ දිනයට සමගාමීව, වාර්ෂිකව පවත්වනු ලබන පිංකමකි. මෙහි සංවිධායකත්වය විහාරස්ථානයේ "තරුණ බෞද්ධ සමිතිය" විසින් දරණු ලබයි.
07. බෝධි පරිශ්‍රය විවෘත කිරීම
පරමධර්මවර්ධනාරාම විහාරස්ථානයේ වත්මන් විහාරාධිපති පූජ්‍ය රත්තොට සීලවංස හිමියන්ගේ අදහසකට අනුව, 2016 වසරේදී විහාරස්ථානයේ බෝධීන් වහන්සේ සහිත බෝ මළුව ප්‍රතිසංස්කරණයකට ලක් විය. එම නව ප්‍රතිසංස්කරණයේදී අටවිසි බුදුවරුන් සදහා වෙන් කරන ලද බුදු කුටි විසි අටක්, දර්ශනීය රන් වැටක්, උඩ මළුවක්, පහන් දැල්වීමට ප්‍රදේශයක් සහ ප්‍රාකාරයක් එක්විය. ප්‍රතිසංස්කරණය කරන ලද බෝධි පරිශ්‍රය, 2017 වසරේ ඔක්තෝබර් මස 01 වන ඉරිදා දින සවස 6.00ට මහා විහාර වංශික, සියම් මහා නිකායේ කෝට්ටේ පාර්ශවයේ මහානායක ධූරන්ධර අතිගෞරවාර්හ ආචාර්ය ඉත්තෑපාන ධම්මාලංකාර ස්වාමීන්ද්‍රයන් වහන්සේගේ ප්‍රධානත්වයෙන්, අනුනායක ධූරන්ධර බෙල්ලන්විල රජමහා විහාරාධිකාරී අතිගෞරවාර්හ අපවත් වී වදළ බෙල්ලන්විල විමලරතනාභිධාන ස්වාමීන්ද්‍රයන් වහන්සේ ඇතුළු සම්භාවනීය මහා සංඝරත්නයේ වැඩමවීමෙන් හා ප්‍රදේශවාසී දායක දායිකා පිංවතුන්ගේ සහභාගිත්වයෙන් විවෘත කෙරෙනි.
08. අටවිසි බුද්ධ පූජා සහ බෝධි පූජා පිංකම
මෙම අටවිසි බුද්ධ පූජා සහ බෝධි පූජා පිංකම, පරමධර්මවර්ධනාරාම විහාරස්ථානයේ සෑම වසරකම කඨින පූජෝත්සවයට සමගාමීව සත් දිනක් පුරාවට සිදු කරනු ලබයි. මෙම පිංකම් මාලාවේදී පූජා කරනු ලබන අටපිරිකර, ගිලන්පස, මල්, පහන්, සුවද දුම් සහ අනෙකුත් පූජා ද්‍රව්‍යන්, ඒ සදහා දායකත්වය දරනු ලබන නිවසේ සිට විශේෂ පෙරහැරකින් විහාරස්ථානයට රැගෙන එනු ලබයි.
09. ශිෂ්‍ය විධායක මණ්ඩලය - 2018
බොරලැස්ගමුව රත්තණපිටිය පරමධර්මවර්ධනාරාම විහාරස්ථ සිරි පඤ්ඤාණන්ද දහම් පාසලේ 2018 වසර සදහා වූ කනිෂ්ඨ සහ ජ්‍යේෂ්ඨ නව ශිෂ්‍ය නායක මණ්ඩලය වෙත නිළ ලාංඡන පැලදවීමේ උත්සවය 2018 වසරේ අප්‍රේල් මස 08 වන ඉරු දින සාර්ථකව පැවැත්විනි. එම අවස්ථාවේදී ශිෂ්‍ය ශිෂ්‍යාවන් 21 දෙනෙකු සදහා ශිෂ්‍ය නායක ලාංඡන පළන්දවන ලදී...
10. බෙල්ලන්විල දේව දූත පෙරහැර
1929 වර්ෂයේ නිර්මාණය වූ බොරලැස්ගමුව රත්තණපිටිය පරමධර්මවර්ධනාරාම විහාරස්ථානය සහ බෙල්ලන්විල රජමහා විහාරය අතරේ පවතිනුයේ ඉතාමත් සමීප සම්බන්ධතාවයකි. එම නිසා ඈත අතීතයේ සිටම බෙල්ලන්විල රජමහා විහාරස්ථානයේ සිදු කරන පිංකම්, උත්සව, වැඩසටහන් සදහා පරමධර්මවර්ධනාරාම විහාරස්ථානයෙන්ද, පරමධර්මවර්ධනාරාම විහාරස්ථානයේ සිදු කරන පිංකම්, උත්සව, වැඩසටහන් සදහා බෙල්ලන්විල රජමහා විහාරස්ථානයෙන්ද සහයෝගය සහ සහභාගීත්වය හුවමාරුවේ. බෙල්ලන්විල ඇසළ මහා පෙරහැරට සමගාමීව සිදු කෙරෙන දේව දූත පෙරහැර, මීට කදිම නිදසුනකි.

බෙල්ලන්විල සති පිරිත් පිංකම් මාලාවේ අවසාන දිනයේ සවස බෙල්ලන්විල රජමහා විහාරස්ථානයෙන් පිටත්වන දේව දූත පෙරහැර, බොරලැස්ගමුව මංසන්ධියට පැමිණ, රත්තණපිටිය මංසන්ධිය හරහා ශ්‍රී පේමානන්ද මාවත ඔස්සේ ගමන්කර, පන්සල පාරෙන් හැරී, පරමධර්මවර්ධනාරාම විහාරස්ථානයට පිවිසෙයි. ඉන්පසු පෙරහැරේ ගමන් කරනා සෑමදෙනාටමත්, බෙල්ලන්විල විහාරස්ථානය සහ එම ප්‍රදේශය නියෝජනය කරමින් පැමිණි ගම්වැසියන්ටත් ආහාර පානවලින් සංග්‍රහ කිරීමක් සිදු කරනු ලබයි. සෑම අයෙක්ටම මදක් නතරවී, ගිමන් හැරීමේ සියලු පහසුකම් ලබා දෙන අතර එය පෙරහැරේ ගමන් කරනා අලි ඇතුන්ටද පොදු වේ.

දේවදූතයා ලෙස පෙනී සිටින ශිෂ්‍යයා සහ පරිවාර දෙව්වරුන් ලෙස පෙනී සිටින ශිෂ්‍යයන් දෙදෙනා පරමධර්මවර්ධනාරාම විහාරස්ථානයේ චෛත්‍යය, බෝධිය සහ බුද්ධ මන්දිරය වන්දනා කර, දේවාල මන්දිරයට පිවිසී පංචශීලය සමාදන්වී, පිරිත් සඤ්ජායනා කර, දේවරාධනාවක් සිදු කරනු ලබයි. ඉන්පසුව දේව දූත පෙරහැර, පරමධර්මවර්ධනාරාම විහාරස්ථානයෙන් පිටත්වී, ජී.එච්.පෙරේරා මාවත හරහා නැවතත් සුපුරුදු පරිදි, බෙල්ලන්විල රජමහා විහාරස්ථානය වෙත ගමන් අරඹයි. මෙම චාරිත්‍රය ඈත අතීතයේ සිටම සිදු කරමින් පැවතගෙන පැමිණි චාරිත්‍රයක් වූවත්, නොවැළැක්විය හැකි හේතූන් මත වසර 40ක් පුරාවට නතර වී තිබූ අතර පසුගිය 2017 වසරේ සිට නැවත ආරම්භවිය.
2018
11. වෙනත්
1) 2017 වසරේ ගං වතුරෙන් අවතැන් වූ ජනතාවට, වියළි ආහාර ද්‍රව්‍ය බෙදා දීමේ වැඩසටහන
2) 2018 ජූනි මස 17 වන දින, මාතලේ රත්තොට වෙරළුගස්තැන්න ශ්‍රී සරණතිස්සාරාම විහාරස්ථානය සහ සිරි නිකේතනාරාම විහාරස්ථානය වෙත ත්‍රිපිටක ග්‍රන්ථ පූජා කිරීම